ایکسپو سینٹرہسپتال کے اخراجات بارے جھوٹی خبریں پھیلائی جارہی ہیں:یاسمین راشد

ایکسپو سینٹرہسپتال کے اخراجات بارے جھوٹی خبریں پھیلائی جارہی ہیں:یاسمین راشد

لاہور:   صوبائی وزیر صحت ڈاکٹر یاسمین راشد نے ایکسپو سینٹر کے اخراجات بارے میڈیا پر زیر بحث خبروں کو جھوٹی قرار دیتے ہوئے کہا ہے کہ 100 دفعہ فرانزک آڈٹ کرانے کو تیار ہوں۔ لاہور میں پریس کانفرنس کرتے ہوئے انہوں نے اپنا موقف بیان کرتے ہوئے کہا کہ ایکسپو سینٹر ہسپتال کے لیے انتظامیہ کو 7 کروڑ روپے کا چیک دیا گیا تھا ۔لیکن اس حوالے سے غلط تاثر دیا جا رہا ہے۔ اخراجات کے حوالے سے تمام تفصیلات ویب سائٹ پر موجود ہے۔ یو این این کے مطابق صوبائی وزیر صحت کا کہنا تھا کہ ایکسپو سینٹر میں بیک اپ پلان کی تیاریاں کرتے ہوئے کم علامات والے مریضوں کو وہاں رکھنے کا فیصلہ کیا۔ ہوم آئسولیشن پالیسی بھی بنا دی گئی ہے۔ تاہم اس حوالے سے حتمی فیصؒہ حکومت کرے گی۔ ڈاکٹر یاسمین راشد نے عوام کو متنبہ کیا کہ وبا ابھی ختم نہیں ہوئی، کسی بھی وقت پھیل سکتی ہے۔ شہری احتیاطی تدابیر پر سختی سے عمل کریں۔ ٹیسٹوں کی استعداد بڑھا دی گئی ہیں۔ عوام کے تعاون کے بغیر اس وبا پر قابو نہیں پا سکتے۔ یو این این کے مطابق انہوں نے بتایا کہ پنجاب میں کورونا مریضوں کی تعداد 13 ہزار 561 ہو چکی ہے۔ان کا کہنا تھا کہ یہ قوم کا پیسہ ہے۔ کورونا کا روزانہ کا خرچہ پنجاب حکومت کی ویب سائٹ پر چیک کیا جا سکتا ہے۔ ایک دفعہ نہیں، 100 مرتبہ فرانزک آڈٹ کرانے کو تیار ہوں۔انہوں نے کہا کہ میڈیا کی بڑی عزت کرتی ہوں۔ لوگ غلط فہمیاں پیدا کرتے ہیں۔ مجھے گلا ہے کہ میرا موقف نہیں لیا گیا۔ مجھے فون کیا جاتا تو اخراجات کے حوالے سے ساری تفصیلات بتا دیتی۔ اب اخراجات کے حوالے سے کلیئر کر دیا ہے۔